សុភាពបុរសដូចបង ញ៉ែអូនបានទេ?
“ថ្ងៃនេះជាថ្ងៃខួបកំណើតខ្ញុំ នេះសំបុត្រសុំអញ្ជើញម៉ាលីទៅកុំខានណា៎!” នឹកដល់ពាក្យប្រធានសុង ខ្ញុំក៏ពិបាកចិត្តភ្លាម។ សំបុត្រពណ៌ត្នោតមួយនោះ គាត់ទើបតែឱ្យមកខ្ញុំពេលចេញធ្វើការ គ្រាន់តែហុចឱ្យរួច ក៏ប្រញាប់ដើរចេញភ្លាម ដើម្បីកុំឱ្យខ្ញុំបដិសេធទាន់ ខ្ញុំត្រលប់សំបុត្រចុះឡើងៗ បើអាចធ្វើបានចង់តែបោះចោលទៅក្នុងធុងសំរាមឱ្យបាត់ក្ដៅចិត្ត។
អ្នកនៅក្នុងក្រុមហ៊ុនគ្រប់គ្នា គ្មាននរណាដែលមិនល្បីពីរឿងព្រាននារីរបស់គាត់ ឱ្យតែឃើញបុគ្គលិកជាស្រីស្អាតមិនបាន ទោះជាមានអាយុច្រើន ហើយមានកូនដល់ទៅ៤នាក់ តែគាត់នៅតែមានចិត្តជាយុវវ័យ ហេតុអីបានជាខ្ញុំហ៊ាននិយាយបែបនេះ មើលចុះសូម្បីកន្លែងធ្វើខួបកំណើតក៏ធ្វើនៅក្នុងក្លឹបដែរ។ “ទ្រាំទៅម៉ាលី ដើម្បីតំណែងជាប្រធានផ្នែកទំនាក់ទំនង ដែលឯងស្រលាញ់” ខ្ញុំនិយាយលើកទឹកចិត្តខ្លួនឯង តែមិនដឹងថា បានផលដល់ពេលណា ក្នុងចិត្តចង់បបួលខូឡាទៅជាមួយ តែកុំអីប្រសើរជាង យកមនុស្សមោឃនោះទៅ ស្រួលមិនស្រួលជាការជួញរឿងដាក់ខ្លួនទៀតផង។ ខូឡាជាមិត្តតែម្នាក់របស់ខ្ញុំ ពួកយើងជិតដិតនឹងគ្នាជាងពីបងប្អូនបង្កើតទៅទៀត តែពេលនេះនាងរៀបការរួចទៅហើយ ខ្ញុំនៅលួចសរសើរពីភាពក្លាហានរបស់យូហា ដែលព្រមរៀបការនឹងមេបញ្ហាដូចជាស្រីល្ងង់នោះ មិនមែនថានាងជាមនុស្សអាក្រក់ តែព្រោះតែចរិតតាមសង្គមមិនទាន់ដូចជាខូឡា ច្រើនតែត្រូវអ្នកដទៃរករឿងជាញឹកញាប់ ពេលខ្លះដោយសារជួយនាង ខ្ញុំក៏ត្រូវស្ពាយរបួសឈឺខ្លួនមកផ្ទះទៀតផង។
“គួរតែពន្យារពេលទៅចូលរួម ទៅឱ្យយឺតក្រោយគេ ហើយចេញមកមុនគេ បែបនេះក៏ល្អ” ខ្ញុំសរសើរខួរក្បាលឆ្លាតរបស់ខ្លួន តាំងពីក្មេងមកខ្ញុំមានសញ្ជាតិញាណ យករួចខ្លួនបានយ៉ាងល្អ មកពីខួរក្បាលនេះឯង។ ខ្ញុំភ្លេចណែនាំខ្លួនឯង ខ្ញុំឈ្មោះម៉ាលីអាយុ២៦ឆ្នាំ សព្វថ្ងៃនេះខ្ញុំរើចេញមកនៅខាងក្រៅម្នាក់ឯង ព្រោះខ្ញុំចូលចិត្តផ្សងព្រេងក្នុងជីវិត ដោយមិនចង់ពឹងពាក់អ្នកផ្ទះ ហើយព្រោះមានប៉ាជាជនជាតិបរទេស ទើបគំនិតរបស់ខ្ញុំត្រូវប៉ាគាំទ្រពេញទំហឹង ទោះម៉ាក់ខំបដិសេធយ៉ាងណា ក៏នៅទីបំផុតខ្ញុំនៅតែរើចេញមករស់នៅក្រៅការគ្រប់គ្រងឱ្យទាល់តែបាន គ្រាន់តែត្រូវសន្យាថា ទៅលេងពួកគាត់ឱ្យបានញឹកញាប់ប៉ុណ្ណោះ។
ខ្ញុំរៀបចំខ្លួន ដោយខោអាវមិនសុភាពពេក ក៏មិនសិចស៊ីពេក ព្រោះខ្ញុំមានគំនិតជានារីសម័យថ្មី ទើបការតែងខ្លួនមិនបានជាបិទជិតប៉ុន្មាន តែនារីប្រភេទខ្ញុំគឺមើលបាន តែប៉ះមិនបាន បើមានមនុស្សដៃរហ័សឯណាចង់សាកល្បងក៏មកចុះ ខ្ញុំនឹងប្រគេនកណ្ដាប់ដៃឱ្យហ្វ្រ៊ីបែបមិនគិតការប្រាក់។ ខ្ញុំជិះតាក់ស៊ីទៅដល់មុខក្លឹបជី ដែលជាក្លឹបមួយល្បីគួរសម ភាគច្រើនបុគ្គលិកក្រុមហ៊ុនខ្ញុំច្រើនរៀបចំកម្មវិធីនៅទីនេះ ហើយនេះក៏ជាលើកទីមួយហើយ ដែលខ្ញុំមកចូលរួម និយាយតាមត្រង់ថាខ្ញុំមិនចូលចិត្តកន្លែងអស់នេះ។
