សង្សារខ្ញុំជាមេមត់
មានអ្នកស្រុកម្នាក់បានអះអាងថា ខ្លួនបានឃើញស្រមោលមួយបានហោះកាត់មុខគាត់កាលពីយប់មិញតើអ្នកជឿឬទេ? ចំណងជើងព័ត៌មានមួយដែលទើបតែបង្ហោះថ្មីៗនៅក្នុងផេចល្បីឈ្មោះមួយ ដែលមានអ្នកចូលទៅបញ្ចេញជាច្រើន ក្នុងនោះភាគច្រើនសុទ្ធតែនិយាយថាជារឿងប្រឌិតដើម្បីទាមទារការចាប់អារម្មណ៍ តែច្បាស់ណាស់ថាម្នាក់នោះមិនមែនជានាង ព្រោះបើទោះជាមនុស្សទាំងអស់មិនជឿលើរឿងអស់នេះ តែនៅមាននាងម្នាក់ដែលទោះស្លាប់ក៏នៅតែជឿថារឿងអប្បិយជំនឿពិតជាមានមែនមករហូតតាំងពីកើត។ រ៉ឺង……រ៉ឺង…. សំឡេងទូរសព្ទរោទ៍ឡើងហើយម្ចាស់ទូរសព្ទក៏មិនពិបាកក្នុងការទាយថាជាអ្នកណាព្រោះទូទាំងក្រុងនេះមានតែម្នាក់នេះគត់ដែលស្គាល់នាង។ “ ចាស!” “ នែ! ចិត្តថ្លើមឯងចង់និយាយម៉ាម៉ាត់ៗហ្នឹងដល់ពេលណា?” សំឡេងនិយាយហាក់ដូចស្រែករបស់ខ្សែម្ខាងទៀតឮខ្លាំងពេកត្រូវតម្រូវឱ្យនាងដកទូរសព្ទចេញពីខ្លួនមួយសន្ទុះចាំដល់អ្នកម្ខាងទៀតស្ងប់ទើបយកមកនិយាយបន្ត។ “ សុំទោសកំពុងរៀនហើយក៏ព្យាយាមហើយដែរ កុំនិយាយលឿនពេកស្ដាប់មិនទាន់” ព្រោះនាងទើបមកទីនេះមិនបានប៉ុន្មានខែ ទើបនាងត្រូវចំណាយពេលបន្តិចទៀតទើបអាចនិយាយដូចជនជាតិដើមទាំងស្រុង។ “ ការងារហើយឬនៅ?” អ្នកម្ខាងទៀតព្យាយាមនិយាយយឺតៗតាមការសុំព្រោះពេលនេះអ្វីដែលសំខាន់ឃើញថាជាការងារដែលត្រូវប្រគល់ឱ្យប្រធានក្រុមនៅថ្ងៃស្អែកនេះបើមិនបានតាមការកំណត់ច្បាស់ជាលំបាករំខានដល់ជីដូនជីតាដែលស្លាប់ទៅបានក្ដីសុខទៅហើយឱ្យឈឺក្បាលទៀតព្រោះធម៌ព្រះដែលប្រធានតែងសូត្រឱ្យស្ដាប់រាល់ពេលដែលការងារហើយមិនទាន់។