ប្រុសម្នាក់
មិនដឹងជានិស្ស័យអ្វីទេ ខ្ញុំចេះតែទាស់ចិត្តនិងអត្តចរិតពូម្នាក់… បីនាក់ក្នុងចំណោមពួកគាត់មានពីរនាក់ ដែលមិត្តភក្ដិខ្ញុំដប់នាក់ ថាសង្ហា… ឯគាត់ មានតែម្នាក់គត់ថាគាត់សង្ហា តែចំពោះខ្ញុំបែរជាគិតផ្សេង គិតថាគាត់មិនដឹងជាមើលម៉េចឃើញសង្ហាទេ តែបើពូពីរនាក់នោះ ខ្ញុំយល់ស្របថាសង្ហា។ ពួកគាត់ស្នាក់នៅអគារជួលរបស់ម៉ាក់ខ្ញុំ ដែលសង់ជារបៀបផ្ទះល្វែង ជញ្ជាំងឥដ្ឋដំបូលប្រក់ស័ង្កសី។ គ្រួសារខ្ញុំក៏ត្រូវស្នាក់នៅទីនោះដែរ ព្រោះផ្ទះរបស់ប៉ាម៉ាក់ខ្ញុំ កំពុងតែសាងសង់ពុំទាន់រួចរាល់។ រាល់ល្ងាច ខ្ញុំចេញពីរៀន ត្រូវជិះកាត់មុខផ្ទះដែលពួកគាត់ជួល រំលងប្រាំល្វែងទើបដល់ល្វែងដែលខ្ញុំស្នាក់នៅបណ្ដោះអាសន្នជាមួយក្រុមគ្រួសារខ្ញុំ ពូពីរនាក់ដែលសង្ហា តែងតែដៀមដាមសរសើរ ថាខ្ញុំស្អាត ចង្រៃអីតែអាពូម្នាក់នោះ មិនដឹងគាត់ជាស្អី ឃើញខ្ញុំងាកមុខចេញរាល់លើក…ពេលខ្លះ ខ្ញុំហាក់មានចិត្តចង់ផ្ចាញ់ផ្ចាលគាត់ ពេលដែលគាត់ឃើញខ្ញុំហើយគេចមុខចេញ ខ្ញុំចង់តែទៅឈរច្រត់ចង្កេះពីមុខគាត់ ចង់ដឹងថាបើខ្ញុំហ៊ានដល់ថ្នាក់ហ្នឹង តើគាត់មើលឬក៏នៅតែគេចមុខចេញ? ល្ងាចនេះ ខ្ញុំចេញមកពីរៀន ពួកគាត់អង្គុយលើគ្រែមុខផ្ទះ គាត់ដេញហ្គីតា មិត្តគាត់ម្នាក់ច្រៀងម្នាក់ទៀតឈរ គោះដៃធ្វើតាមចង្វាក់ភ្លេង ឃើញខ្ញុំជិះម៉ូតូមកដល់ពូម្នាក់គោះដៃធ្វើចង្វាក់ភ្លេងសួរខ្ញុំ «ទើបនឹងចេញពីរៀនមែនទេ?» «ចា៎ស»
