អាថ៍កំបាំងនៃក្តីស្រឡាញ់
(ជូនចំពោះប៉ាម៉ាក់គ្រប់រូបលើលោក ខ្ញុំសង្ឃឹមថាអ្នកអាននិងព្យាយាមអានរហូតដល់ចប់) កាលពីតូចខ្ញុំតែងមានអារម្មណ៍ថាម៉ាក់និងប៉ារបស់ខ្ញុំមិនដែលស្រឡាញ់គ្នាទេ ពួកគាត់តែងឈ្លោះគ្នាជាញឹកញាប់ មានពេលខ្លះម៉ាក់យំ ពេលខ្លះប៉ាស្រែកដាក់ម៉ាក់ធ្វើឱ្យខ្ញុំខូចចិត្តខ្លាំងណាស់តែខ្ញុំលាក់វាទុកក្នុងចិត្ត ពួកគាត់អាចគិតថាខ្ញុំមិនដឹងអី តែការពិតខ្ញុំបែរជាអាចចងចាំពីរឿងទាំងនោះថែមទាំងគិតពីវាគ្រប់ពេលទៀតផង។ ខ្ញុំមានបងប្អូនបីនាក់ ហើយខ្ញុំជាកូនពៅស្និទ្ធស្នាលបំផុតជាមួយបងស្រីកណ្តាល ព្រោះបងស្រីធំបានទៅបន្តការសិក្សានៅភ្នំពេញទើបយើងមិនសូវមានការទាក់ទងជិតស្និទ្ធនឹងគ្នានៅពេលគាត់មកលេងផ្ទះម្ដងៗ គាត់និយាយជាមួយប៉ាតិចតួចណាស់ ខ្ញុំដឹងថាគាត់មិនចូលចិត្តប៉ាទេ ព្រោះគាត់ធ្លាប់និយាយថាស្អប់ព្រោះប៉ាចូលចិត្តពិសារស្រា និងរករឿងម៉ាក់ចំណែកបងស្រីទីពីរខ្ញុំក៏និយាយបែបនេះដែរ រួមផ្សំនិងការដែលខ្ញុំធ្លាប់ឃើញបងស្រីខ្ញុំឱបលួងលោម ម៉ាក់ដែលកំពុងយំបណ្ដើរនិងរៀបអីវ៉ាន់បណ្ដើរបម្រុងចាកចេញពីផ្ទះ ទើបក្នុងគំនិតរបស់ខ្ញុំមានតែ ពាក្យដែលនៅវិលវល់ក្នុងចិត្តជានិច្ចគឺ “ប៉ាមិនដែលស្រឡាញ់យើង”។
ម៉ាក់អាយុ១៨ឆ្នាំរៀបការជាមួយប៉ា ដែលមានអាយុច្រើនជាងបីឆ្នាំ ការរៀបការនោះកើតឡើងដោយសារលោកតានិងលោកយាយទួត អាចហៅបានថាជាការផ្សំផ្គុំរបស់ចាស់ទុំ។ មិនដល់មួយឆ្នាំផងក៏មានបងស្រីធំ បងស្រីធំជាមនុស្សម្នាក់ដែលរឹងមាំនិងដាច់ខាត។ មានពេលខ្លះ ខ្ញុំគិតថាគាត់កាចនិងមានអារម្មណ៍ថាខ្លាចគាត់ជាខ្លាំងហើយខ្ញុំក៏ច្បាស់ក្នុងចិត្តដែលថា គាត់មិនស្រឡាញ់ខ្ញុំទេបើគាត់ស្រឡាញ់ខ្ញុំតែបន្តិច គាត់មុខជាមិនវាយនិងរករឿងខ្ញុំបែបនេះទេ។ ថាទៅទំនាក់ទំនងក្នុងគ្រួសារយើងស្ទើរតែហៅថា សោះកក្រោះតែម្ដង។ ខ្ញុំជាមនុស្សដែលស្ងៀមស្ងាត់ពេលនៅផ្ទះតែក៏មាត់ច្រើនបំផុតពេលនៅសាលា ព្រោះនៅសាលាមិនមានប៉ាដែលមានទឹកមុខកាចចាំតែឃាត់ឃាំងខ្ញុំមិនឱ្យទៅលេងជាមួយកូនគេអ្នកជិតខាង។ ប៉ាដែលចូលចិត្តឈ្លោះជាមួយម៉ាក់ និងម៉ាក់ដែលយំដោយការខូចចិត្តនៅមានបងស្រីចិត្តអាក្រក់ដែលតែងតែស្ដីថាឱ្យខ្ញុំគ្រប់ពេល ហើយរាល់ពេលដែលខ្ញុំមកដល់ផ្ទះ ខ្ញុំនឹងចាប់ផ្ដើមមានអារម្មណ៍ថានៅលើលោកនេះ គឺមានតែខ្ញុំប៉ុណ្ណោះដែលត្រូវការក្តីស្រឡាញ់ទាំងដែលគ្មាននរណានឹកឃើញចាប់អារម្មណ៍និងយកចិត្តទុកដាក់។
