លោក​នូ ហាច កើត​នៅ​ថ្ងៃ​ទី​២៦ ខែមិថុនា ឆ្នាំ​១៩១៦ នៅ​ឃុំ​កំពង់ព្រះ ស្រុក​សង្កែ ខេត្ត បាត់ដំបង ។ ឪពុក​នាម ​ឃួ​ន នៅ និង​ម្តាយ​នាម ​ឱរ មួ​ច ពួក​គាត់​ជា​កសិករ។ លោក​នូ ហាច ជា​កូនច្បង​និង​មាន​ប្អូន​ៗ​ច្រើន​នាក់​ទៀត ក្នុង​នោះ​មាន​ប្អូនស្រី​៣​នាក់។ លោក នូ ហាច ស្ថិត​ក្នុង​ចំណោម​ក្រុម​មនុស្សដំបូងគេបង្អស់ ដែលហ៊ានទម្លុះ​ទម្លាយនូវទំនៀមអក្សរសិល្ប៍ខ្មែរបុរាណ ហើយចាប់យកការសរសេរបែបថ្មី តាមលំនាំអក្សរសិល្ប៍បស្ចិមប្រទេស ជាពិសេសអក្សរសិល្ប៍បារាំង។ រហូតមកទល់បច្ចុប្បន្ន របៀបសរសេររបស់អ្នកនិពន្ធរូបនេះ នៅតែអាចអន្ទងព្រលឹងអ្នកអានឲ្យអណ្ដែតអណ្ដូងក្នុងមនោសញ្ចេតនាដ៏​សែន​ស៊ីជម្រៅ។ របៀបសរសេររបស់អ្នកនិពន្ធរូបនេះដដែល ថែមទាំងបន្តជះឥទ្ធិពលដល់អ្នកនិពន្ធជំនាន់ថ្មី បើទោះបីជាពេលវេលាកន្លងផុតទៅអស់រាប់ទសវត្សទៅហើយក្តី។