បុរសអាថ៌កំបាំងប៉ះស្រីឆ្នាសអត់ចិត្
ហ្វីណា ជាមនុស្សស្រីសាមញ្ញមិនចេះតុបតែងខ្លួនដូចមនុស្សស្រីដទៃទៀតទេ។ ប៉ុន្តែគេជាមនុស្សមានមន្តស្នេហ៍ព្រោះតែស្នាមញញឹមរបស់គេ។ ហើយគេជាមនុស្សរួសរាយ កាច ឆ្នាស។ គេជាមនុស្សដែលចង់បានសេរីភាព មិនចង់ឲ្យអ្នកណាមកត្រួតត្រា ឬសួរនាំពេលគេទៅណាមកណាឡើយ។ ហ្វីណាក៏ចង់បានសង្សារដែរ ព្រោះនៅពេលដែលគេទៅណាមកណា គេតែងតែច្រណែនអ្នកដទៃថាហេតុអីក៏គេមានមនុស្សយល់គ្នាទៅវិញទៅមក ហើយនៅពេលណាទើបមានមនុស្សម្នាក់ អាចស្វែងយល់ពីចិត្តគេបាន? គេធ្លាប់ទាក់ទងជាមួយមនុស្សប្រុសជាច្រើននាក់ ប៉ុន្តែគេទាក់ទងបានត្រឹមតែយ៉ាងយូរ១ខែប៉ុណ្ណោះ។ មនុស្សគ្រប់គ្នាតែងតែគិតថាគេជាមនុស្សស្រីសាវា ប៉ុន្តែការពិតទៅ ព្រោះតែសង្សារចាស់របស់គេទាំងអស់នោះគ្មានអ្នកណាម្នាក់យល់ពីអារម្មណ៍គេឡើយ។
គេអង្គុយលេងហ្វេសប៊ុកដូចរាល់ដង ប៉ុន្តែគេបានបង្កើតហ្វេសប៊ុកផ្ទាល់ខ្លួនថ្មីមួយទៀត។ ហ្វីណាក៏បាន add ទៅមិត្តភ័ក្ដិចាស់ៗដែលធ្លាប់ស្គាល់។ ហើយនៅសុខៗ គេក៏នឹកឃើញមនុស្សម្នាក់ដែលគេចាំបានថាជាគូដណ្ដឹងរបស់មិត្តភ័ក្ដិរបស់គេ គេក៏បាន add ទៅម្នាក់នោះ។ យ៉ារ៉ូគឺជាបុរសម្នាក់ដែលហ្វីណាបាន add ទៅ។ ការពិតទៅហ្វីណាយល់ច្រឡំចំពោះយ៉ារ៉ូព្រោះមិត្តភ័ក្ដិរបស់យ៉ារ៉ូទេទើបជាគូដណ្ដឹងរបស់មិត្តភ័ក្ដិគេ។ គ្រាន់តែយ៉ារ៉ូឃើញហ្វីណាក្នុងហ្វេសប៊ុកភ្លាម គេក៏មានចិត្តស្រលាញ់ហ្វីណាទៅហើយ ទាំងពួកគេមិនដែលជួបគ្នា ឬស្គាល់គ្នាឡើយ។ យ៉ារ៉ូក៏បានឆ្ងល់ខ្លួនឯងដែលថាហេតុអ្វីបានជាគេមានអារម្មណ៍លើស្រីម្នាក់នោះ? បន្ទាប់មកយ៉ារ៉ូក៏បានទទួលហ្វីណាធ្វើជាមិត្តភ័ក្ដិក្នុងហ្វេសប៊ុកនឹងគ្នា។ យ៉ារ៉ូជាមនុស្សដែលមានញាណពិសេស គេអាចដឹងពីចិត្តរបស់អ្នកដទៃ ប៉ុន្តែមិនមែនអាចដឹងគ្រប់រឿងបាននោះទេ។ គេធ្លាប់មានសង្សារម្នាក់ ហើយយ៉ារ៉ូក៏បានស្វែងយល់ពីចិត្តស្រីម្នាក់នោះដែរ ប៉ុន្តែយ៉ារ៉ូបានដឹងពីចិត្តរបស់នាងតែបន្តិចប៉ុណ្ណោះ ហើយពួកគេក៏បានបែកគ្នាទៅ។ ប៉ុន្តែគ្រាន់តែយ៉ារ៉ូបានឃើញរូបរបស់ហ្វីណាក្នុងហ្វេសប៊ុក គេក៏មានអារម្មណ៍ថាស្រលាញ់ហ្វីណាទៅហើយ គេបានសួរខ្លួនឯងថានេះជានិស្ស័យមែនទេ? គេបានតាំងចិត្តនិងអារម្មណ៍របស់គេហើយសម្លឹងមើលទៅរូបថតរបស់ហ្វីណា។ ហើយយ៉ារ៉ូមានអារម្មណ៍ដឹងពីចិត្តរបស់ហ្វីណាថានាងជាមនុស្សយ៉ាងម៉េច? យ៉ារ៉ូប្រើពេលគិតជាច្រើនថ្ងៃទម្រាំតែដាច់ចិត្តឆាតទៅហ្វីណា។ យ៉ារ៉ូបានផ្ញើសារជា sticker សួស្ដីទៅកាន់ហ្វីណា ហើយពួកគេទាំងពីរនាក់បានឆាតជាមួយគ្នាទៅវិញទៅមក។ នៅសុខៗហ្វីណាក៏ឆាតសួរទៅយ៉ារ៉ូ៖ ហ្វីណា : លោកជាគូដណ្ដឹងរបស់ភីសាមែនទេ? យ៉ារ៉ូ : យល់ច្រឡំហើយ មិនមែនខ្ញុំទេ គឺមិត្តភ័ក្ដិរបស់ខ្ញុំម្នាក់ទៀតតើ!
