គ្រូកំលោះប៉ះកូនសិស្សក្រមុំ
ប្រពន្ធក្រមុំចេញពីរៀនហើយ ទុកយូរមិនបានឡើយក្រែងកំលោះស្របាលៗនាងមកឆក់ញ៉ែទៅបាត់ ព្រោះខ្លួនខ្ញុំមានអាយុក្រែលហើយ។ «បងសត្យានៅណា? ពេលនេះខ្ញុំចេញពីរៀនហើយណា។» មនោរាហៅទូរសព្ទមកពីវិទ្យាល័យរបស់នាង ឲ្យខ្ញុំទៅទទួលត្រលប់មកផ្ទះ។ ថ្ងៃនេះចម្លែកណាស់ នាងតេមកខុសពីសព្វមួយដង។ ពេលនោះខ្ញុំក៏បានឆ្លើយតបទៅនាងវិញ៖ «បងនៅសាលា ISLS។ ចុះម្ដេចថ្ងៃនេះអូនចេញពីរៀនលឿនម្ល៉េះ?» «គឺលោកគ្រូមករាគាត់មិនរៀន ទើបចេញរហ័ស។» «ចឹងបងទៅដល់ឥឡូវហើយ!» «ចា៎ អូនចាំ»
មិនដល់១០នាទីល្អផង ខ្ញុំក៏បានមកដល់ខាងមុខវិទ្យាល័យរបស់នាង។ នារីម្នាក់ឈរបង្ហាញរូបរាងយ៉ាងតូចច្រឡឹង សក់វែងអន្តាយ នៅក្រោមដើមត្រសេកមានម្លប់ត្រឈឹងត្រឈៃ។ រំលេចដោយស្នាមញញឹមមើលពីចម្ងាយស្គាល់ច្បាស់ថាជាមនោរា ធីតារូបសម្រស់របស់លោកគ្រូបង្រៀនភាសាអង់គ្លេស សឿត សត្យា។ នរៈទៅដល់មិនទាន់នាងក៏បាននិយាយលាមិត្តរួមថ្នាក់ដើរមកកាន់ម៉ូតូសង្សារដែលកំពុងបើកមួកសុវត្តិភាពរង់ចាំ៖ «មាគ៌ា វរលក្ខណ៍ គ្នាទៅមុនហើយណា ព្រោះបងសត្យាគាត់បងទទួលហើយ។» អ្នកទាំងពីរនោះមិនបានស្ដីយ៉ាងណាមកកាន់សង្សាររបស់ខ្ញុំឡើយ គឺពួកនាងគ្រាន់តែងក់ក្បាលជាសញ្ញាយល់ព្រម។ ប៉ុន្តែខ្ញុំដឹងថាក្រមុំទាំងពីរនោះច្រណែននឹងមនោរាដែលមានលោកគ្រូកំលោះសង្ហាដូចជាខ្ញុំមកទទួល ទាំងជូនមករៀនជារៀងរាល់ថ្ងៃ។
