ស្នូរកាំភ្លើងបីគ្រាប់នៅវិទ្យាល័យ
ព្រឹកព្រលឹមមេឃចាប់ផ្ដើមភ្លឺស្រឡះសមនឹងអាកាសធាតុត្រជាក់ស្រិបធ្វើឲ្យរងាដល់ឆ្អឹងខ្នង សូមក្រឡេកមើលនៅខែត្របន្ទាយមានជ័យ ខណៈនេះសិស្សានុសិស្សនៃវិទ្យាល័យកូបបានធ្វើដំណើរចូលមកកាន់សាលាទាំងបន្តកន្ទុយគ្នាយ៉ាងរដឹក មានសិស្សខ្លះដើរថ្មើរជើង ខ្លះជិះកង់ម៉ូតូ រួចនិយាយសាសងគ្នាយ៉ាងកងរំពងពេញវិថីសាលា។ ក្នុងនោះយើងឃើញយុវតីមួយរូបស្ថិតក្នុងវ័យ១៦ឆ្នាំ ដែលសម្រស់នាងល្អផ្ដាច់គេក្នុងវិទ្យាល័យនេះ។ លីយ៉ា គឺជាឈ្មោះរបស់នាង។ នាងបានដើរដំណើរញាប់ស្មេរសំដៅមករកមិត្តនារីម្នាក់ទៀតដែលអង្គុយចាំលើបង់រួចជាស្រេច។ - អេ! រីណា ឯងមកអង្គុយចាំខ្ញុំយូរហើយមែនទេ? ម៉ារីណា នារីរូបស្រស់ដែលមានវ័យប្រហាក់ប្រហែលនឹងស្រស់ស្រីយើងដែរ បានវាចាតប៖ - អត់ទេ! ខ្ញុំទើបមកដល់មុននេះបន្ដិចទេ! អ៊ឺម….និយាយអ៊ីចឹងដូចជាមិនឃើញសារ៉ា?
- ពិតមែនហើយ (លីយ៉ាងក់ក្បាល) រាល់ថ្ងៃសារ៉ាតែងតែមកមុនពួកយើងជានិច្ចប្លែកតែថ្ងៃនេះ ដូចជាមិនឃើញនាងទាល់តែសោះ! លីយ៉ាបញ្ចប់សម្ដីរបស់នាងសឹងតែមិនទាន់ចប់ផង ស្រាប់តែឃើញសិស្សជាច្រើនស្រែកផ្អើលឆោឡោរត់បន្ដគ្នាទៅខាងក្រោយសាលា ក្នុងនោះក៏ឃើញមានប៉ូលីសពីរនាក់រត់ទៅផងដែរ។ លីយ៉ាចាប់ផ្ដើមចិញ្ចើមដោយក្ដីឆ្ងល់ រួចសួរទៅរីណាភ្លាម៖ - រីណា! នៅខាងក្រោយសាលាមានរឿងអ្វីកើតឡើង? បានជាគេផ្អើលឆោឡោ? - ខ្ញុំក៏មិនដឹងច្បាស់ដែរ! តោះពួកយើងទៅមើលបន្ដិចមើល៍! ថាចប់ កញ្ញាទាំងពីរបានរត់ទៅខាងក្រោយសាលាយ៉ាងប្រញាប់ប្រញាល់។
