បទចម្រៀងខ្មោច
កាលពីបុរាណយូរយារមកហើយ មានក្រុមល្ខោនយីកេមួយតែងតែចល័តសម្ដែងពីភូមិមួយទៅភូមិមួយតំបន់មួយទៅតំបន់មួយដើម្បីរកកម្រៃជាអង្ករត្រីសាច់ចិញ្ចឹមជីវិត។
តួឯកស្រីក្នុងក្រុមនោះឈ្មោះនាង សុតា ជាស្រីល្បីឈ្មោះទោះបីគាត់លេងល្ខោនតាំងពីជំទង់រហូតដល់ពេលនេះវ័យជិត៤០ឆ្នាំហើយក្ដី។
ក្រោយៗមកនេះគាត់ចាប់ហាត់ចេះទំនុកច្រៀងថ្មីមួយដែលប្លែកទាំងភ្លេងប្លែកទាំងអត្ថន័យ គឺទន់ពីរោះនិងលន្លង់លន្លោចពេករហូតដល់ល្បីសាយភាយភូមិណាដែលក្រុមនេះទៅដល់គេតែងសំណូមពរឲ្យនាង សុតា ច្រៀងបទនោះ។ ហេតុភេទដែលចម្លែកគឺរាល់ពេលដែលនាង សុតា ច្រៀងបទចម្រៀងនោះចប់កាលណា តួល្ខោនខាងប្រុសដែលចេញមកសម្ដែងជាមួយនាងត្រូវមានរបួសធ្លាក់ពីលើឆាកឬក្អួតចង្អោរឈឺចុកចាប់ជាច្រើនថ្ងៃ។
លុះដល់នាងមកដល់ភូមិថ្មីមួយដែលកៀកគ្នាចម្ងាយផ្លូវតែមួយយប់ តួប្រុសកាលពីម្សិលមិញសុខភាពមិនទាន់គ្រាន់នឹងអាលបានឡើងឆាកកើត លោកអៀងជាមេក្រុមក៏បានសំណូមពរឲ្យតួរងម្នាក់ទៀតឡើងមកសម្ដែងនឹងនាងសុតាជំនួសវិញ។ ដល់ពេលនាងច្រៀងចប់ តួជំនួសនោះក៏រងរបួសទៀតធ្វើឲ្យមនុស្សម្នាក្នុងក្រុមកាន់តែជឿថានាងសុតាគឺពិតជាស្រីចង្រៃដែលនាំគ្រោះដល់អ្នកដទៃរាល់គ្នាណាសម្ដែងជាតួប្រុសជាមួយនាង។