ជំទាវទាំង៣នៃក្រុងបាដាដ
យប់មួយនៅផ្ទះជំទាវហ្ស៊ូបែដា មានជនពនេចរបីនាក់បានសូមស្នាក់អាស្រ័យ ដោយហេតុតែមានក្ដីអាណិតនាងក៏ព្រមព្រៀងជាមួយបងប្អូនស្រីពីរនាក់ទៀត ទទួលយកអាសាឱ្យជនទាំងបីចូលទៅខាងក្នុងផ្ទះ ដើម្បីស្រស់ស្រូបចំណីអាហារជាមួយគ្នា។ ទាំងម្ចាស់ផ្ទះទាំងភ្ញៀវបរិភោគច្រៀងរាំយ៉ាងសប្បាយចិត្ត។
ព្រះចៅខាលីពបានចាកចេញពីរាជវាំងដោយសម្ងាត់ អមដំណើរជាមួយជំនិតព្រះអង្គពីររូប។ ពេលមកដល់មុខផ្ទះជំទាវនេះ ក៏បានឮតន្ត្រីនិងសំឡេងសើចសប្បាយក្អាកក្អាយ ទ្រង់ក៏មានចិត្តចង់ចូលទៅកម្សាន្តខាងក្នុងផ្ទះនោះដែរ។ ព្រះអង្គបានគោះទ្វារសូមចូលស្នាក់អាស្រ័យមួយរាត្រី ដោយពោលបន្លំថា ទ្រង់គឺជាឈ្មួញស្រុកក្រៅ មករកស៊ីនៅទីនេះ ហើយពេលនេះយប់ជ្រៅ ទើបសូមផ្ទះសម្រាកមួយរាត្រី នៅព្រឹកស្អែកនឹងចេញដំណើរបន្តទៅទៀត។
បីនាក់បងប្អូនដែលជាម្ចាស់ផ្ទះក៏បានពិគ្រោះយោបល់គ្នា រួចក៏យល់ព្រមទទួលភ្ញៀវនេះឱ្យចូលដោយមិនមានអាក់អន់ចិត្តអ្វីឡើយ ប៉ុន្តែជំទាវហ្ស៊ូបែដាក៏បានពោលប្រាប់ពីបម្រាបខ្លះៗ ដូចពេលកាលប្រាប់ជនពនេចរបីនាក់មុននេះដែរ គឺថាទោះបីឃើញហេតុអ្វីកើតឡើងក្នុងផ្ទះ ចម្លែកយ៉ាងណា ក៏មិនត្រូវសួរនាំជាដាច់ខាត បើព្រមសន្យាទើបឱ្យចូល។
អ្វីៗនៅក្នុងផ្ទះជំទាវទាំងបីនោះ ក្រៅពីចំណីអាហារដ៏ឈ្ងុយឆ្ងាញ់និងតន្ត្រីដ៏ពីរោះ គឺមានរឿងចម្លែកៗជាច្រើន នាំឱ្យភ្ញៀវដែលសន្យារបូតមាត់សួរនាំទាំងមិនបានតាំងចិត្ត។ ពេលពួកគេសួរទៅម្ចាស់ផ្ទះរួច ជំទាវទាំងបីកើតខឹងយ៉ាងខ្លាំង រហូតបញ្ជាឱ្យកូនចៅចាប់ពួកភ្ញៀវក្បត់សម្ដីយកទៅសម្លាប់ចោលភ្លាមៗតែម្ដង។
